LAOAG CITY – Dupudopen dagiti pasahero iti maysa a bus terminal ditoy siudad ti Laoag maysa nga aldaw sakbay ti bisperas ti paskua.
Segun ken ni Mr. Jonny Ibac, dispatcher ti maysa kadagiti bus terminal ditoy siudad ti Laoag, idi Biernes, Disiembre 20 ket nangrugin nga agdudupudop dagiti pasahero nga agawid ken rummuar ditoy probinsia.
Inbatadna a ti kangrunaan a pagturongan dagiti pasahero ket idiay Baguio City, Cagayan ken Metro Manila.
Inlawlawagna a basar iti obserbasionna ket ad-adu dagiti pasahero a rummuar ditoy probinsia maidasig kadagiti agsubli ditoy probinsia.
Kunana nga awan met pay ti panagkiddaw ti bus terminal-da idiay Manila para iti kanayonan a bilang dagiti bus.
Innayonna nga agsardeng ti operasionda inton Disiembre 31 ken agsubli met laeng ti panagpasadada iti kabigatanna, Enero 1, 2025.
