LAOAG CITY – Ad-ado a Pilipino ti nangibaga a marigrigat da iti maikatlo a kwarter ti 2024.
Daytoy ket basar iti survey nga inaramid ti Social Weather Stations (SWS) manipod Setyembre 14 agingga iti Setyembre 23.
Iti inparuk-at a report ti Social Weather Stations, naduktalan nga adda ti 59% dagiti pamilya a pilipino ti mangikonkonsiderar iti bagida kas marigrigat idinto a 13% ti nabigbig kas “borderline” wenno inkabil da ti bagida iti nagbaetan ti marigrigat ken saan a marigrigat, ken 28% ti nangibaga a saan da a marigrigat.
Ti porsiento ti pamilya a nabigbig kas marigrigat ket 59% idi Setyembre 2024 wenno katukad ti 16.3 milyon pamilya, manipod iti 58% wenno 16 milyong pamilya idi Hunyo 2024.
Inbatad ti Social Weather Stations a daytoyen ti kangatoan a lebel ti self-rated poverty sipud Hunyo 2008.
