LAOAG CITY – Immulin iti uppat nga indibidual dagiti pimmusay gapu iti agtultuloy a nalawa a layus idiay Dubai, United Arab Emirates gapu iti awan sardayna a panagtudo iti nasao a lugar.
Basar iti report, karaman kadagiti biktima a saanen a nakalasat pay iti nasao a layus ket maysa a lalaki nga Emirati nga agtawen ti 70 kalpasan a naiyanud ti layus ti luganna iti Northern Ras Al Khaimah emirate.
Bayat nga immunan a naipadamag nga adda ti tallo a Pilipino ti natay met gapu met laeng iti kalamidad a nabigbig nga isuda Sina Danny Casipong, Jennie Gamboa ken Marjorie Saquing.
Ni Casipong ket natay kalpasan a natnag iti sinkhole, idinto da Gamboa ken Saquing ket na-suffocate gapu ta nakaangotda ti adu nga asok iti uneg ti shuttle service a naglugananda.
Maipalagip nga immuna a dimmuprak ti bagyo idiay Oman, UAE a nakatayan dagiti 20 a tattao iti nadakamat a lugar.
Kabayatanna, inpasingked ti panagsagana ti Overseas Workers Welfare Administration a tulungan dagiti dadduma pay a kakailian nga Overseas Filipino Worker a makasubli ditoy pagilian ngem iti agdama ket awan pay ti nagboluntario maipapan iti daytoy.
