LAOAG CITY – Kinumpirmaran ni Mrs. Marilou Sapungan, Revenue District Officer ditoy probinsya nga intono Lunes, Enero 17 ket agsublin ti operasyon ti BIR.
Segun kenni Sapungan, maipatungpal pay laeng ti skeletal work force ken dagiti agsubli ket dagiti agnegatibo iti resulta da iti covid-19 testing.
Patien na nga adda met dagiti agnegatibo iti resulta iti laksid a saan pay a rimuar ti resulta ti swab test da.
Inlawlawag na a kageddan iti panagsubli ti operasyon da ket maipatungpal met ti No Vaccination, No Entry.
Inbatad na nga ikarigatan da a maipaayan ti serbisyo dagiti tattao kas iti panangrenew ti business registration nga agngudo intono Enero 31.
Kunana a dagiti agbayad ket magutgutigot nga agusar ti online services tapno saanen a mapmapan iti opisina na.
Kabayatanna, kunana a 100 a porsiento a nabakunaan kontra covid-19 dagiti amin nga empleado ti nasao nga ahensya.
