LAOAG CITY – Inpakaammo ni Mr. Aldrin Camba, ti Revenue District Officer ti Bureau of Internal Revenue ditoy siudad ti Laoag a maikatlo iti puesto ti Ilocos Norte iti intero a pagilian maipapan iti collection performance.
Segun kenkuana, nagun-od ti probinsia iti nasao a puesto kalpasan a naartapanda ti target collection-da iti napalabas a tawen.
Inbatadna nga umabot iti 3.2 bilyon a pisos ti nakolektarda para iti tawen 2023 idinto a nangatngato ita a tawen 2024 ti masapol a magun-odda a target collection nga umabot iti 25 a porsiento maibasar iti Regional Office gapu ta awan pay ti inyatnag manipod iti National Office.
Inlawlawagna nga adu ti source of collection iti rehion uno a dakkel a makatulong kadakuada tapno al-alisto ti pannakagun-od ti target collection-da.
Innayonna nga adu ti programa iti opisinada a maipatungpal ita a tawen a pakabenipisiaran dagiti naruay nga umili.
