LAOAG CITY – Inyistorya ni Mrs. Hernando, residente iti Barangay Buttong ditoy ciudad ti Laoag no apay a maipagarop a saan a pirmaan ti maysa a doktor iti Laoag City General Hospital (LCGH) ti birth certificate ti apoko na a kaipasngay.
Segun kenni Hernando, nagpasngay ti anak na bayat nga adda iti tricycle rason nga inderetso dan iti Laoag City General Hospital ken ti nangasisitir kadakuada ket binigbig na a Dra. Eva Agres.
Inlawlawag na a tapno masakup ti Philhealth ti bill da iti ospital ket kasapulan ti birth ceritificate ngem maipagarop a saan a pirmaan ti nadakamat a doktor.
Kunana a ti nagbalin a palawag ti doktor kadakuada ket saan nga isuna ti nangpaanak rason a saan na a pirmaan.
Inbatad na a binalakadan isuda ti ospital a mapan iti City Health Office tapno ammoen no anya ti rumbeng nga aramiden na.
Mainaig iti daytoy, nagturong da iti midwife iti Barangay Tangid ken Barangay Mangato ngem saan da a pinirmaan ti birth certificate ti maladaga gapo maipagarop ga expired ti lisensya dagitoy.
Innayon na nga idi malem kalman ket nakaawid da met laengen babaen iti tulong ti City Social Welfare and Development Office.
Kabayatanna, inbatad ni Dr. Marsha Lou Wafan, ti mangidadaulo ti Laoag City General Hospital a binalakadan da dagiti maseknan a mapan iti City Health Office.
