LAOAG CITY – Kalikagum nga ikanselar ti Office of the Solicitor General (OSG) ti birth certificate ti nasuspinde a Bamban, Tarlac Mayor Alice Guo, maibasar iti naipila a petision iti Tarlac Regional Trial Court.
Agbinnulig ti Office of the Solicitor General ken ti Philippine Statistictics Authority (PSA) iti panangipilada ti petision.
Inbatad ni Solicitor General Menardo Guevarra a ti panangipila ti cancellation of the birth certificate ket mangidatag ti pangibasaran para iti sumaruno a panangipila ti petision para iti quo warranto tapno mapadisi ni Guo kas Mayor ti Bamban ken mapilaan pay ti kanayonan a kaso.
Inlawlawagna a karaman iti argumento iti petision ti maipagarup a pannakapaay ni Guo a sumurot kadagiti legal a kasapulan para iti late registration of birth.
Immunan nga inrakurak ti Philippine Statistictics Authority a nakitada dagiti iregularidad iti birth certificate ni Guo idinto ti National Bureau of Investigation (NBI) met ti nangkumpirmar nga agpada ti fingerprints ti Mayor iti babai a Chinese a ni Guo Hua Ping.
