LAOAG CITY – Nadismaya ni Vice Mayor Rey Carlos Farinas ditoy ciudad ti Laoag kalpasan nga awan ti quorum iti 126th regular session iti sangguniang panlungsod itay malem, Pebrero 11.
Daytoy ket kalpasan a lima laeng dagiti kameng iti Sang Panlungsod a nagatendar iti sesyon.
Segun iti bise mayor, masapol nga adda ti pito a miembro iti konseho nga agatendar pakairamanan ti pakairamanan ti presiding officer tapno maaddaan ti quorom.
Inpakaammo na a daytoyen ti maikalima a gundaway nga awan quorom iti sesyon ti Sang Panlungsod gapo iti panaggigiddan nga ag-emergency leave dagiti dadduma a kameng iti konseho.
Inpetteng na a saan a rumbeng a kastoy ti maaramid gapo ta ado dagiti ordinansa ken resolusyon a maitantan ti pannakatratar na.
Naamoan a dagiti kameng ti konseho nga awan iti sesyon ket napan da nagatendar iti proclamation rally ni Presidente Ferdinand Marcos Jr. ditoy ciudad ti Laoag.
