LAOAG CITY – Inbatad ni Mr. Joefrey Lucas, Vice Presidente iti grupo dagiti traysikelan ditoy ciudad ti Laoag a benepisyo kadakuada nga agiturturong ti traysikel ti manamnama a pannakaipangato ti plete iti traysikel.
Kuna na a pakaragsakan da no maipangato ti plete iti traysikel gapu ta ngimmato ti presyo ti gasolina ken dagiti partes ti traysikel.
Segun ken ni Lucas, 15 a tawenen nga agpaspasada ti traysikel ken idi damo na ti agpasada ket 5 agingga ti walo a pisos ti plete agingga a napagbalin nga 9 agingga nga 11 a pisos idi 2011.
Mangnamnama ni Lucas a maiyimplementar a dagus ti pannakaipangato ti plete ti traysikel ditoy ciudad ti Laoag.
Naamoan a kalikagom dagiti agpaspasada ti traysikel a nangatngato ngem 3 a pisos ti pangngatoan ti plete ditoy ciudad ti Laoag.
