LAOAG CITY – Naiget ti panang-monitor dagiti kameng ti Bureau of Jail Management and Penology ditoy siudad ti Laoag ti salun-at ken kasasaad dagiti Persons Deprived of Liberty maipapan iti mapaspasaran a kinabara ti panawen.
Segun ken ni Jail Inspector Shiela Marie Sapaden, ti mangidadaulo iti Bureau of Jail Management and Penology ditoy siudad a natalged amin dagiti 67 a balud kabayatan ti kaadda dagitoy kadagiti pagbaludan.
Inbatadna a maysa kadagiti wagas nga ar-aramidenda iti baet ti napudot a paniempo ket ti panangipalagip ken panangipatungpal iti proper hygiene.
Kunana a tunggal aldaw ti Lunes ket maipalagip kadagiti maseknan a balud ti panagdigusda ti mamitlo a daras iti kada aldaw, panaginum ti adu a danum, pannangan kadagiti nasustansia a taraon ken liklikanda nga agipauneg ti taraon a makaitunda ti allergy.
Inlawlawagna a babaen iti daytoy ket maliklikan a makaala ti nagduduma a sakit nangruna iti agdama a sasaaden ti panawen a masapol ti lugar tapno mabang-aran ti bagi ken nasalun-at.
Mainaig iti daytoy, kuna ni Jail Inspector Sapaden nga awan ti nagsakit kadagiti balud iti baet ti panawen ti kalgaw gapu ta adda dagitoy iti nasayaat a kondision.
Kabayatanna, naammoan a saan a nagsarsardeng dagiti balud iti panagaramidda kadagiti nagduduma a produkto kas ti dishwashing liquid a nayon a birokda iti baet nga addada iti uneg ti pagbaludan.
