LAOAG CITY – Inbatad ni Jail Inspector Shiela Sapaden iti Bureau of Jail Management and Penology ditoy ciudad ti Laoag a mangsanay da manen kadagiti balud para iti panagaramid kadagiti bayong ken bag.
Kunana a dagiti immunan a dimmalan ti panagsanay wenno dagiti dati a weaver ket naiyakar dagitoyen rason a mangisuro da iti sangapulo ket lima a balod tapno sumablat nga agaramid kadagiti nasao a produkto.
Innayon ni Sapaden a mangayab da kadagiti skilled weaver manipod iti ciudad ti Batac tapno isuda ti mangisuro kadagiti balud ditoy ciudad ti Laoag.
Kabayatanna, inbatad ni Sapaden a temporaryo a nagsardeng ti panagaramid da kadagiti bayong gapu ta limitado laeng ti materyales dagitoy ken aggapu pay laeng iti Metro Manila.
Kunana a gapu iti napasaran a bagyo ket saan da a nakagatang kadagiti kasapulan tapno makaaramid ti bayong.
Nupay kasta, kuna ni Sapaden nga agtultuloy latta ti panaglako dagitoy nangruna no adda dagiti agorder kadakuada.
Inpakaammo na a maysa daytoy kadagiti pamastrekan dagiti Persons Deprived of Liberty gapu ta uray adda da iti uneg ti pagbaludan ket adda latta ti maipaay da kadagiti pamilya da iti ruwar.
