LAOAG CITY – Umabot ti 37 nga indibidual dagiti balligi a naalaan ti dara para iti naisayangkat a Blood Letting Activity a nagbinnuligan ti Philipine Red Cross – Laoag City, Ilocos Norte Chapter, gobierno lokal ditoy ciudad ti Laoag ken ti Bombo Radyo Laoag.
Naisayangkat ti aktibidad iti Laoag City Hall Auditorium itay laeng bigat.
Karaman kadagiti nakipagpaset ken successful blood donors ket dagiti kameng ti Philippine National Police (PNP), empleado iti gobierno lokal ditoy ciudad a pakairamanan ni Mayor Michael Marcos-Keon, partner na a ni Monette Soriano ken dadduma pay a pribado nga indibidual.
Immuna iti daytoy, ad-adda pay a napaigetan ti screening para kadagiti nagidonar ti dara tapno masigurado a nasalun-at dagitoy kangrunaan na ita a panawen ti covid-19 pandemic.
Kabayatanna, naragsakan met ni Mrs. Edna Orcino, administrador ti Philippine Red Cross ditoy probinsya gapu ta ado dagiti nakipagpaset iti aktibidad iti baet ti mapaspasaran a pandemya.
Inpasingked na nga itultuloy da ti kastoy nga aktibidad tapno mapagtalinaed ti suplay a dara iti nagduduma nga ospital a maipaay kadagiti agkasapulan.
