LAOAG CITY – Dinayaw ni Sangguniang Panlalawigan Member Rafael Medina iti panag-inhibit ni Sangguniang Panlalawigan Member Marlon Sales mainaig iti resolusion a mangendorsar iti pannakaestablisar ti Special Economic Zone iti ili ti Pagudpud.
Segun ken ni Bokal Medina, daytoy ti pakakitaan a ti hunta probinsial ket transparent iti amin a desision ken addang nga ar-aramidenda.
Inlawlawagna a saan a para iti bukud dagitoy a bagi ti panpanunotenda no diket ti interes ti publiko.
Inbatadna a saanna a kayat a saoen a saan nga umanamong ni Sales iti gakat no diket kayatna a maliklikan ti posible a conflict of interest.
Immuna iti daytoy, kabayatan ti maikadua a pannakaibasana ti nasao a resolusion ket inpakaammo ni Bokal Sales nga ag-inhibit daytoy.
Gapu iti daytoy, kayatna a saoen a saan a makipagpartisipar ti deliberasion ken panagbutos.
Kunana nga idi naidasar daytoy nga umuna ken kabayatan ti public hearing ket saanna nga ammo a karaman ti lotena kadagiti maapektaran ti Philippine Economic Zone Authority wenno PEZA.
Inpettengna a saan a naited ti kumpleto a listaan no diket site development laeng.
Inpalgakna nga apaman a naammoanna nga adda ti lotena iti proposed Philippine Economic Zone Authority ket insigida a napanunotanna ti ag-inhibit.
Kabayatanna, naipasa ti nasao a gakat iti maikadua ken maudi a pannakaibasana no sadinno a pimmabor amin dagiti kameng ti Sangguniang Panlalawigan malaksid ken ni Bokal Sales nga immun-unan a nag-inhibit.
