LAOAG CITY – Napadayawan ni Bombo Jay Agnir ti Bombo Radyo Laoag kas Best Local AM Radio Personality iti intero a probinsia ti Ilocos Norte iti kaliplippas a 2nd Aweng Awards ti Young Communicators’ Circle wenno Y2C iti Mariano Marcos State University – Teatro Ilocandia iti siudad ti Batac.
Nakagun-od ti kangatoan a puntos ni Bombo Jay manipod kadagiti napagtitipon a butos no sadino isuna ti nagballigi kadagiti tallo a nakabinnalubalna a maibilang a batikan a Media Practitioners ditoy probinsia.
Gapu iti daytoy, napaneknekan ni Bombo Jay nga iti baet nga isuna ket baro pay laeng iti lubong ti Media ket awan ti imposible a mapasamak ken saan pulos nga agbalin a lapped iti panaggun-od ti arapaap no napnoan ti talek ken kararag iti Dios.
Mainaig iti daytoy, personal nga inawat ni Bombo Jay ti nasao a pammadayaw a mangipasimudaag ti kinasiribna iti pakasaritaan ti panagirakurak kadagiti kaudian ken kabaraan a damdamag a rumbeng laeng a maammoan dagiti umili manipod ditoy probinsia, pagilian ken iti ballasiw-taaw.
Indanonna met ti napalaos a panagyamanna kadagiti amin a listeners ken viewers ti Bombo Radyo Laoag iti inawatna a naisangsangayan a pammadayaw kas maysa a Journalist.
Naammoan a ti Aweng Awards ket kakaisuna nga university-based award-giving body iti Ilocos Region a mangted pammadayaw kadagiti media personalities, radio stations ken news pages.
Kabayatanna, maipalagip nga immunan a nagun-od ni Bombo Romnick Quimoyog ti Best Local AM Radio Personality kagiddan ti Y2C’s first-ever Best Local AM Radio Station ti Bombo Radyo Laoag iti napalabas a tawen 2023.
