LAOAG CITY – Napadayawan kas Best Local AM Radio Station iti intero a probinsia ti Ilocos Norte ti Bombo Radyo Laoag iti kaliplippas a 4th Aweng Awards ti Young Communicators’ Circle wenno Y2C iti Mariano Marcos State University – Teatro Ilocandia iti siudad ti Batac.
Malaksid iti daytoy, napadayawan met kas Best Local AM Radio Personality iti intero a probinsia ti Ilocos Norte ni Bombo Jay Agnir.
Segun ken ni Ms. Jenn Khylei Lacuesta, Executive Chairperson ti Young Communicators’ Circle, dagiti criteria iti panagpili ti Best Local AM Radio Station ket ti pakabuklan a kalidad dagiti nagduduma nga entry kas ti news program, commentary program ken entertainment program idinto a dagiti criteria met iti panagpili ti Best Local AM Radio Personality ket ti kaatiddog ti serbisio, clarity wenno kinalawag iti panangipadanon kadagiti damdamag, kalidad ti news story, accuracy ken relevance ti programa.
Inbatadna a ti proseso dagiti nagbalin a nominado iti Aweng Awards ket ti registration wenno ti sending of entries a naikabil iti official facebook page ti students’ organization nga i-share dagiti estudiante iti social media.
Inlawlawagna a kalpasan iti daytoy ket naukkon amin dagiti entries ken adda dagiti sumagmamano a departamento a nagserbi kas panel iti panangtingiting kadagiti nominado kas ti Department of Languages and Literature, Social Sciences Department ken Strategic Communications Office pakairamanan dagiti officers ti Young Communicators’ Circle.
Inpasingkedna a kadagiti sumarsaruno a tawen ket saanto laengen a provincial level no diket mapagbalin a regional level agingga a magun-od ti national level ti Aweng Awards.
Naammoan a ti Aweng Awards ket kakaisuna nga university-based award-giving body iti Ilocos Region a mangted pammadayaw kadagiti media personalities, radio stations ken news pages.
Kabayatanna, daytoy ti maikadua a gundaway a nagun-od ti Bombo Radyo Laoag ti Best Local AM Radio Station ken maikadua met a gundaway a nagun-od ni Bombo Jay Agnir ti Best Local AM Radio Personality.
