LAOAG CITY – Kalikagum ni Mrs. Antonette Bareng, mangidadaulo ti Business Permit and Licensing Office ditoy siudad ti Laoag a maplastar dagiti peddlers nga aglaklako iti igid ti kalsada.
Segun kenkuana, mangrugidanton a mapan mangiyurnos kadagiti peddlers tapno saanda nga okuparan dagiti kalsada a mangitunda iti nairot a trapiko a dakkel a problema para kadagiti motorista.
Inbatadna nga addan ti pannakisaritana iti Kapitan ti Barangay 5 ditoy suidad tapno agtitinnulong dagitoy a mangbirok iti napintas a pagpuestoanda.
Inlawlawagna a nasken a nakapuesto dagiti maseknan
a peddlers iti umiso a lugar tapno awan met laeng ti tumaod a problema wenno maperwisyo iti panaglakoda.
Innayonna nga adun dagiti peddlers nga aglaklako iti sango ti Mariano Marcos State University – College of Teacher Education ti nakaalan ti business permit-na.
Maipalagip nga inpakaammo ni Bareng itay kallabes nga adu dagiti saan pay a nakaala ti business permit-na a nakapuesto iti Barangay 5 ditoy siudad kangrunaan iti sango ti nasao a pagadalan.
