LAOAG CITY – Kalikagum ti Business Permit and Licensing Office nga idadauloan ni Ms. Antonette Bareng nga agbalin kas departamento ti lokal a gobierno ti opisinada ditoy siudad ti Laoag.
Inbatadna a daytoy a gagemda ket kas gundaway a manayonan ti empleadoda gapu ta marigatanda a mapan ag-inspect dagiti pasdek negosio ditoy siudad.
Kunana a maysa kadagiti saanda a naaramid a naipatungpal ket ti ordinansa maipapan iti Closed Circuit Television camera kadagiti pasdek-negosio gapu iti kinakurang ti empleadoda.
Inlawlawagna a babaen iti nasao nga ordinansa a naidasar iti Sangguniang Panlungsod ket mapagbalin a natalged ken alisto a masolbar dagiti krimen a mapaspasamak kadagiti a pasdek-negosio ditoy siudad.
Inpakaammona a nagkiddaw ti kanayonan nga empleado gapu ta aminado daytoy a saanda a maaramid digiti dadduma a responsibilidadda gapu iti nasao a parikot.
Kabayatanna, naammoan a ti Business Permit and Licensing Office ket kas paset wenno division babaen iti City Mayor’s Office.
