LAOAG CITY – Inlawlawag ni Ms. Antonette Bareng, mangidadaulo ti Business Permit and Licensing Office ditoy ciudad ti Laoag no apay a saan na nga inikkan ti permit dagiti narway nga aglaklako iti lawlaw ti Laoag City Public Market and Commercial Complex.
Daytoy ket iti papan da panagkiddaw ti permit kalpasan a naisyuan dagitoy ti ticket gapo iti panaglabsing da iti anti-obstruction law.
Segun kenni Bareng, dagiti maseknan ket saan a rumbeng nga agpwesto iti nasao a lugar gapo ta makaabeng iti dalan.
Nupay kasta, kunana a mabalin a maikkan ti permit dagitoy no addan ton ti madutukan nga agbantay iti lawlaw ti merkado publiko a mangkita no dagitoy ket umak-akar da met laeng.
Innayon na a maawatan ken maasyan kadagitoy ngem masapol a sumurot da iti pagannurutan ken no kayat da ti aglako ket mabalin da pay a makisarita kadagiti pasdek negosyo nga agpwesto da iti sangwanan dagitoy.
