LAOAG CITY – Rinugyanen ti International Criminal Court (ICC) ti confirmation of charges hearing tapno tratarenno sumango iti full-blown trial ni dati a Presidente Rodrigo Duterte mainaig iti inpatungpal na a kontrobersyal a ‘war on drugs.’
Segun kadagiti prosecutor, ni Duterte ket responsable iti maipagarop a pannakapapatay ti naruay nga indibidual a maikonkonektar iti anti-drug campaign na di daytoy ti presidente ti Pilipinas ken uray idi mayor iti ciudad ti Davao.
Indasar pay ti ICC prosecutors ti tallo a kangrunaan nga akusasyon kontra ken ni Duterte a maikonkonektar iti crimes against humanity:
Count 1: Pammapatay iti uneg ken lawlaw ti Davao City idi panawen a daytoy ti mayor a maipagarop nga insayangkat ti maibilang a Davao Death Squad.
Count 2: Pammapatay kadagiti maibilang nga “high-value targets” kabayatan a daytoy ti presidente ti Pilipinas.
Count 3: Pammapatay ken pananggandat a panagpatay kadagiti operasyon ti barangay clearance a mainaig iti national anti-drug campaign.
Immunan nga inlawlawag ti ICC a ti agdama a panagdengngeg ket confirmation of charges hearing paylaeng no sadinno a tingitingen dagiti judges no adda ti ”substantial grounds” wenno umdas a pagibasaran ti prosecution tapno ituloy ti kaso iti maysa a trial.
Maipalagip a naglikudan ti kampo ni Duterte dagiti alegasyon no sadinno nga inpetteng dagiti abogado na a maipagarop nga awan ti hurisdiskyon ti ICC iti kaso.
Nupay nagikkat ti Pilipinas manipod iti ICC idi 2019, inbatad ti korte nga adda paylaeng ti bilegna nga imbestigaren dagiti krimen a napasamak idi miembro ti pagilian ti tribunal.
Naarestar ni Duterte idi Marso 2025 ken agdama nga adda iti kustodiyar ti ICC iti The Hague.
Inpasingked dagiti judges nga adda iti nasayaat a kondisyon ken kabaelan na ti makipaset kadagiti legal a proseso.
Manamnama nga idasar ti prosekusyon kadagiti sumarsaruno nga aldaw dagiti ebidensya a sungbatan met ti kampo ni Duterte.
