LAOAG CITY – Kinumpirmaran ni Barangay Captain Mark Rivera iti Barangay Bubuos iti ili ti Solsona a nakalockdown ita ti sibubukel a barangay da.
Segun kenni Rivera, kalpasan a dimmalan dagiti sumagmamano a residente iti swab test ket adda ti nainayun a 11 a nagpositibo nga ita ket umaboten iti 28 a total case iti lugar da.
Inlawlawag na a dagiti nagpositibo ket isuda dagiti primary contacts dagiti ummunan a nagpositibo iti virus.
Kunana a dagiti sumagmamano a baro a nagpositibo ket adda pay laeng iti pagtaengan da wenno naka-home quarantine gapo ta napunnon dagiti isolation facility ti probinsya.
Inbatad na pay a maysa a barangay tanod ti nagpositibo a primary contact ti ina na a positibo met laeng iti makapatay a sakit.
Naamoan a ti panagngato ti kaso ti virus iti nasao a barangay ket kalpasan a ti naggapo iti Metro Manila ngha indibidwal ket nagpapasken ditoy ciudad ti Laoag ken no sadinno a ti pamilya na ti nagatendar ken rumrumwar nga isu ti rason ti panagwaras ti sakit.
Mainaig iti daytoy, kuna ni Rivera a nagnegatibo isuna iti virus ken dagiti awan pay resulta ti swab test a pada na nga opisyales ket naka-quarantine.
Innayon na a dagiti opisyales a negatibo iti sakit ket kapilitan nga isuda ti panangimaton iti barangay da tapno matulungan dagiti kabarangayan da a naka-lockdown.
