LAOAG CITY – Sinuspenso ti Iran ti amin a diplomatic channels ken indirect communication daytoy iti Estados Unidos, sumagmamano nga oras sakbay ti self-imposed deadline ni United States President Donald Trump tapno lukatan manen ti Tehran ti Strait of Hormuz.
Basar iti Iranian media outlet Tehran Times, inserra ti Iran ti amin a linya ti komunikasion daytoy pakairamanan ti panagsinnukat ti mensahe iti Amerika.
Kagiddan iti pangta ni Trump, nangiparuk-at ti Islamic Revolutionary Guard Corps (IRGC) ti Iran a mangibagbaga a nalpasen ti “good neighborliness and self-restraint,” ken mabalin a maawanan ti access iti langis ken gas ti Estados Unidos ken dagiti kaalyado daytoy iti rehion ti sumagmamano a tawen.
Ti ballaag ket kalpasan ti naipadamag nga airstrikes ti Estados Unidos ken Israel iti Kharg Island, maysa a kangrunaan nga oil-export terminal ti Iran iti Persian Gulf, basar iti state-linked Mehr News Agency.
Tinarget iti panangatake ti radar station, docking facilities, ken dadduma pay a military installations ti nasao nga isla.
