Inpakaammo ni Brgy. Chairwoman Emelie Salvador iti Brgy. Caunayan iti siudad ti Batac nga adda ti naiyestablisar nga isolation facility para kadagiti returning residents a kabarangayanda.
Inbatad na nga uppat dagiti isolation unit ti nakasagana partikular iti Caunayan Community Center.
Mainaig iti daytoy, kuna na a sakbay a nalukatan ti isolation facility ket adda ti nagbalin a pammalubos ti lokal a gobierno iti siudad ti Batac babaen kadagiti opisyales ti nagduduma a departamento nangruna iti mayor.
Rumrumuar a ti Brgy. Caunayan ket maysa kadagiti ummuna a barangay iti siudad ti Batac a nakaiyestablisar ti isolation facility.
Kabayatanna, kuna ni Salvador a dagiti returning residents ket pito nga aldaw laeng nga agtalinaed iti barangay isolation facility kalpasan ti pito nga aldaw a panagtalinaed da iti municipal isolation facility tapno makumpleto ti 14-day quarantine.
Iti agdama ket adda ti maysa a naka quarantine iti isolation facility iti nasao a barangay.
