LAOAG CITY – Naireklamo ti maysa a kapitan ti Brgy. Cabayo idiay ili ti Vintar gapo ti maipagarop a panangmolestiya na iti maysa a babai.
Nabigbig ti kapitan a ni Ronnie Agresor, addaan ti umno a tawen, ken residente iti nasao a barangay idinto a ti babai ket ni Mildred Acosta y Dumamao, agtawen ti 43, awanan ti asawa ken residente ti Brgy. 22, Bani iti ili ti Bacarra.
Segun ti report, nagkamang ni Acosta iti PNP-Vintar no sadinno a kinuyog daytoy dagiti kamkameng ti PNP-Bacarra.
Basar ti palawag ni Acosta, kabayatan nga adda iti Cabayo Elem. School idi Mayo 22 gapo ti training da iti welding ket simmangpet ti kapitan kadwa na dagiti dadduma nga on-the-job training.
Inbatad na a nagpakuyog ti kapitan kenni Acosta a mapan iti lugan na ngem bayat a magmagna na ket kellaat lattan a ginuyod na ti biktima ken ginandat na a bisungen ngem nagresistir ti biktima.
Nupay kasta, maipagarop nga intuloy latta ti kapitan ti nangguyod iti biktima.
Naamoan a kalpasan ti pasamak ket nagtalapwagaw ti suspek a kapitan ken rumrumwar a daytoy ket nabartek.
