LAOAG CITY – Inadmitir ni Barangay Chairman Jefrey Lucaten iti Barangay 56-A, Bacsil North ditoy ciudad ti Laoag nga adda dagiti kabarangayan na a nagdoble a nagawat ti ayuda manipod iti nagduma a programa kas iti TUPAD wenno Tulong Panghanapbuhay sa Ating Disadvantaged/Displaced Workers ken AKAP wenno Ayuda Para sa Kapos ang Kita Program.
Inlawlawag na nga idi Oktubre iti napalabas a tawen ket nagpaisubmitir ti gobierno probinsyal iti listaan ti nagan dagiti agawat ti ayuda.
Kuna na a saan a nagresponde a dagus ti gobierno probinsyal kalpasan a naisubmitir da ti listaan isut gapuna nga inulit da ti nangisubmitir.
Nupay kasta, inbatad na a nakigtot da gapu ta ita laeng a bolan ket isu metten ti pannakaipaay ti ayuda mnaipod iti gobierno dagiti insumitir da a nagan isut gapuna nga adda dagiti nagdoble a nagawat.
Inpakaammo ni Lucaten a nailawlawag na metten daytoy a banag kadagiti kalugaran na babaen iti inyuswat da a barangay assembly, ken inpagarop na a naawatan da amin daytoy a banag.
Patien met ni Lucaten a nakaawat aminen dagiti kabaragayan na gapu ta bassit laeng ti residente iti barangay da.
Kabayatanna, naglikudan ni Barangay Sec. Elimor Lorenzo ti alegasyon nga isuna ti kangrunaan nga agilislista kadagiti agawat ti ayuda no sadinno a maipagarop nga inkabil na amin ti nagan dagiti kabbalay na ken agsasaruno ti panagawat da.
Inpetteng na nga awan ti kinapudno na daytoy gapu ta sekretaryo laeng iti barangay a ti trabaho na ket agencode ken awan ti karbengan na nga agpili kadagiti maipaayan ti ayuda manipod iti gobierno.
Innayon na a dudua da laeng iti ina na nga agkabbalay ken awan ti kinapudno na nga agsasaruno ti panagawat na ti ayuda.
