LAOAG CITY – Maluksaw ni Brgy. Chairman Frudencio Agustin iti Brgy. 10 iti ili ti San Nicolas, kalpasan nga inarestar dagiti kameng ti Philippine National Police iti nadakamat nga ili ti maysa kadagiti barangay tanod da a ni Glen Dela Cruz babaen iti naisayangkat a buy-bust operation.
Segun kenkuana, kalpasan a naammoanna a naarestar ni Dela Cruz ket permi a maluksaw daytoy gapu ta saanna nga ekspektaren a maysa kadagiti tanod na ti nagbalin a subject iti Anti-Illegal Drug Buy-Bust Operation.
Gapu iti daytoy, adda ti plano ni Agustin a makitaripnong kadagiti barangay officials tapnu saan pay a maulit ti napasamak a banag.
Kinunana a saan isuna a nagkurang iti kanayonan a pammalagip ken ni Dela Cruz agsipud ta nabiit pay laeng daytoy a nadutukan kas barangay tanod iti nasao a barangay.
Maipalagip a naarestar ni Glen Dela Cruz kalpasan a maipagarup a naglako daytoy ti mapapati a shabu iti maysa a polis a nagpammarang kas poseur-buyer.
Nakumpiskar manipud iti suspek ti mapapati a maysa a sachet ti shabu ken buy-bust money nga agbalor iti P7,000.00.
Naammoan a maibilang daytoy kas Street Level Indvidual ken immunan a natiliw idi 2015 babaen iti panagsalungasingna iti Republic Act 9165 wenno Comprehensive Dangerous Drugs Act of 2002.
