LAOAG CITY – Kinumpirmaran ni Brgy. Chairman Christoper Fontanilla iti Barangay Magnuang iti ciudad ti Batac a kabarangayan na ti maysa kadagiti nagpositibo ti covid-19 ditoy probinsya.
Inpakaammo na a ti kabarangayan da a nagpositibo ti covid-19 ket maysa a pahinante iti ciudad ti Batac isut gapuna a masansan ti panagbiyahe na a mapan iti Metro Manila.
Kuna na nga awan dagiti sintomas ti covid-19 a narikna ti kabarangayan da no di ket inang-angal na laeng ti sakit iti rusok na.
Inbatad na nga apaman a naamoan na daytoy a damag ket kinataripnong na a dagus dagiti amin a konsehal na ken indeklara na ti total lockdown iti barangay da.
Inlawlawag na nga awanen dagiti mapalubusan a rumuar iti barangay da malaksid laeng dagiti maibilang a frontliners kas kadagiti health workers, empleado iti LGU ken kameng ti PNP.
Innayon na a dagiti kabarangayan na a komersyante ket mapandanto laengen iyawat dagiti lako da kadagiti negosyante iti checkpoints ken awan ti mapalubusan a rumuar iti national highway.
Immapela pay ti kapitan kadagiti kabarangayan na nga aggiinnanus da gapu ta saan a sinsinan a kalaban ti virus.
