LAOAG CITY – Naireklamo ti Barangay Chairman ken Barangay Kagawad kalpasan a maipagarop a dinangranda ti nabartek a lakay idiay Brgy. Utol, Bangui, Ilocos Norte.
Nabigbig ti biktima a ni Ariel Cimatu, agtawen ti 52, naasawaan; idinto a dagiti maak-akusaran ket da Brgy. Kapitan Remigio Castro ken Brgy. Kagawad Roland Rafanan, agpapada a residente iti nasao a barangay.
Iti inisial nga imbestigasyon ti PNP-Bangui, siguden a nabartek ni Cimatu idi napan nakiinom iti grupo ni William Lorenzo ken ditan a nagprobokar.
Napan naganawa ni Brgy Kagawad Rafanan ngem imbes nga agsardeng ni Cimatu ket maipagarop a pinagsasawan na daytoy ti dakes isut gapuna a dinanog na ti lakay.
Gapu ta saan a maanawa ni Cimatu ket tinawagan ni Brgy Kagawad Aida Martin ti Kapitan ngem iti panagturong na iti lugar ket maipagarop nga insublat a pinagsasawan ti lakay isut gapuna a pinarusukan daytoy ni Castro.
Kalpasan ti daytoy ket naipan iti iti Bangui District Hospital ni Cimatu gapu ta angalen na a nasakit ti buksitna ngem naiyakar daytoy iti Governor Roque Ablan Senior Memorial Hospital wenno GRASMH ditoy ciudad ti Laoag.
