LAOAG CITY – Inbatad ni Barangay Chairman Glendford Paguirigan iti Barangay Sta. Maria ditoy ciudad ti Laoag a saanna a ninamnama a mangabak da kas Model barangay ti pannakaimplementar ti Solid Waste Management ditoy ciudad.
Inadmitir ni Paguirigan nga idi damo da nga iyimplementar daytoy nga addang ket narigatan da.
Nupay kasta, iti panangisayangkat da ti information dissemination babaen ti tulong dagiti agtutubo iti barangay ket naisuro kadagiti kalugaran da no kasanu a paglalasinen dagiti basura.
Inpetteng ti kapitan a masapol a no aldaw ti panagkolektar kadagiti basura ket napaglalasinen dagitoy manipod iti marunot ken dagiti saan a marunot.
Innayon na a dagiti saan a mangtungpal iti daytoy ket saan a maala ti basura na ken maisubli kadagiti agtagikua.
