LAOAG CITY – Natiliw ti maysa a barangay tanod iti Barangay Tangaoan iti ili ti Piddig gapo iti panagikot na ti cal. 9MM a paltog.
Nabigbig daytoy a ni Raffy Miguel, agtawen ti 31, awanan ti asawa ken residente iti nasao a barangay.
Naamoan a malaksid iti paltog ket adda pay ti narekobre kenkuana a bala a naka-load a mismo iti nasao nga armas, ken maysa a magazine a naglaon ti lima a bala.
Mainaig iti daytoy, nagkedked ni Miguel a nangted ti reaksyon iti pannakatiliw na.
Nupay kasta, kuna ni Police Captain King Ramos, hepe ti PNP-Piddig nga adda iti impluwensya ti nasanger ni Miguel bayat nga adda iti igid ti kalsada a magmagna.
Maipalagip bayat ti panagpatrolya dagiti kameng ti pulisya iti nasao nga ili ket nakita da ti ikot ni Miguel a paltog rason a dagus da daytoy a tiniliw.
Iti agdama ket nagtalinaed iti kustudiyar ti PNP-Piddig ti nasao a barangay tanod.
