LAOAG CITY – Napaneknekan manen ti pagsasao a ti aso ket maibilang kas “man’s best friend”.
Daytoy ket kalpasan ti napasamak a panagtagtagbat iti paset ti Barangay 24 iti ili ti San Nicolas a ti involved ket aguliteg.
Nabigbig ti biktima a ni Brgy. Tanod Benedict Dumlao y Damo, agtawen ti 38 idinto a ti suspek a kaanakan na ket ni Virgilio Molina Jr.
Iti eksklusibo nga interview ti Bombo Radyo Laoag ken ni Dumlao, inadmitir na a nakainom ti arak idi napanna rinaot ti kaanakan na a manarimaan ti panaglutluto na.
Inbatad ni Dumlao nga immuna da a nagdinnanog ken ni Molina.
Naamoan a kabayatan ti panagkabkabil dagiti dua ket rimmaman met ti aso ni Dumlao babaen ti panangkagat na ti saka ni Molina.
Gapu ti daytoy, ad-adda manen a nagpungtot ni Molina ket napan nangala ti samurai ken isu ti intagbat na ken ni Dumlao.
Kuna ni Dumlao nga idi tagbaten ni Molina ket insarapa na ti ima na a nakatamaan ken dandani nakaisinaan ti kikit ken tammudo ti akin-kannawan nga ima na.
Kabayatanna, inkalintegan met ni Molina a napan laeng nangala ti samurai idi nakita na nga adda ti bitbit a buneng ti uliteg na a barangay tanod.
Kinumpirmaran pay ni Barangay Kagawad Hilario Aurelio nga idi saan pay a nagbalin a barangay tanod ni Dumlao ket kanayun nga agprobokar no mabartek ngem sipud nagbalin a tanod ket nagparbengen.
