LAOAG CITY – Naisayangkat ti Barangay Disaster Preparedness Program kangrunaanna ti Basic Life Support Training para kadagiti Barangay Service Point Officers wenno BSPO’s iti nadumaduma a paset ti probinsia.
Segun ken ni Mr. Marcell Tabije, Local Disaster Risk Reduction Management Officer wenno LDRRMO ti Provincial Government of Ilocos Norte, paset daytoy iti kalikagum ni Gob. Matthew Marcos Manotoc a maisagana a naimbag dagiti barbarangay iti ania man a didigra wenno pagkasapulan dagiti kakailian.
Kunana a gagem ti pannakaisayangkat ti nasao a panagsanay a matun-uyan ti kalikagum ti gobernador nga umadu dagiti masanay a mangipaay ti serbisio kadagiti kakailian.
Inlawlawagna a babaen iti nasao a panagsanay ket al-alisto a marespondian dagiti “health emergencies” kadagiti barangay nangnangruna kadagiti nasusulinek a barangay wenno dagiti adayo iti poblasyon.
Inbatadna a malaksid kadagiti BSPO’s dimmalan pay iti nasao a panagsanay dagiti city/municipal population officers.
Inbunannagna a kinabinnulig ti Provincial Resiliency Office a nangiyuswat iti nasao a panagsanay ti Bureau of Fire Protection ken ti Population Gender and Development Office wenno GAD.
Innayonna a kangrunaan a naiyadal kadagiti maseknan iti idadalanda iti nagtallo nga aldaw a training ti “first aid” kas kadagiti nasken a maaramid no adda dagiti masugatan, mablo wenno madesgrasya ken no kasano a maiyaplikar dagiti ramit a mausar no adda dagiti “health emergency” kas iti kaadda ti maatake.
