LAOAG CITY – Addaan ti kangatoan a pundo para iti flood control projects ti Department of Public Works and Highways ti Bulacan ken kaaduan pay ti naawat a kontrata basar iti sumbongsapangulo.ph website.
Iti nasao a website, ti Bulacan ket addaan ti flood control deals a dumanon iti P43,754,961,321.73; sinaruno ti Cebu a P26,614,501,059 ken Isabela nga addaan ti P22,770,663,528.03.
Adda iti maikapat ti Tarlac P18.5-B; Camarines Sur P17.5-B; Albay P16.1-B; Pampanga P14.5-B; Leyte P14.2-B; Pangasinan P13.6-B; Misamis Oriental P13.4B; Oriental Mindoro P11.1-B; Negros Occidental P11-B; Cavite P11-B; La Union P11-B; Davao Del Sur P10.8-B; Ilocos Norte P10-B; Agusan Del Norte P9.9-B; Nueva Ecija P9.3-B; Laguna P9-B ken Occidental Mindoro P8.6-B.
Mainaig iti daytoy, nakapungtot ni Presidente Ferdinand Marcos Jr. iti naduktalanna a “ghost” project iti Barangay Piel idiay Baliuag, Bulacan.
Segun iti Presidente, nailanad iti report ti Department of Public Works and Highways a “completed” ti proyekto a napundoan ti P55 a milyon ngem awan ti aniaman a nakita uray maysa a landok wenno sako ti semento.
Nagballaag ni Marcos kadagiti agar-aramid ti panagkunniber iti pundo ti gobierno para kadagiti flood control projects gapu ta inpasingkedna a mapagsungbat dagitoy.
Kagiddan iti daytoy, inbilin ti Presidente iti Department of Public Works and Highways a mangisubmitir kadagiti listaan dagiti proyekto iti napalabas a tallo a tawen.
Inpettengna nga iti baet ti binilyon a piso a pundo a nailatang ket nagtalinaed ti panaglayos kadagiti nagduduma a paset ti pagilian.
Kabayatanna, nadakamat a ti Bulacan ti kadakkelan a nakaawat ti flood control budget iti intero a rehion 3 wenno 45% ti pundo.
