LAOAG CITY – Kinumpirmaran ti PhiVolcs ti nairekord nga explosive eruption manipud iti Mt. Kanlaon ita a bigat ti Martes.
Basar iti inisyal nga impormasion, alas-5:52 ti bigat idi nakita ti napuskol nga asok manipud iti crater ti aktibo a bulkan.
Gapu iti daytoy, manamnama ti napuskol nga ashfall kadagiti probinsia ti Negros Occidental ken Negros Oriental.
Kangrunaan a maapektaran ti western section ti probinsia a La Carlota City, La Castellana ken dagiti kaparanget a lugar.
Sakbay pay iti daytoy, naaddaan pay ti 14 a volcanic earthquakes kadagiti naglabas nga oras.
Ti Sulfur Dioxide Flux ket dimmanonen iti 1,655 a tonelada.
Agtultuloy a pagan-annaden dagiti residente gapu iti risgo iti kudil ti napudot nga abo pakairamanan dagiti addaan ti respiratory concerns gapu iti posible a maangot ti kontaminado nga angin.
