LAOAG CITY – Balligi ti pannakaisayangkat ti Buntis Congress ditoy siudad ti Laoag.
Segun iti lokal a gobierno ditoy suidad a ti pannakaiwayat iti nasao a programa ket tapno maipaadal kadagiti inna ti kangrunaan nga aramidenda tapno nasalun-at dagiti sikogda.
Inbatad ni Mrs. Maybelle Bumanglag ti City Population Commission Office (POPCOM) a ditoy a mailawlawag kadakuada no ania dagiti rumbeng nga aramidenda kas no ania a taraon ti masapol nga ipaunegda.
Kunana a napateg a maipaadal kadakuada ti family planning tapno makitada wenno maitedda ti kasayaatan a wagas nga aramidenda kadagiti agbalin nga annakda.
Naammoan a gagem ti lokal a gobierno nga agbalinen daytoy a regular a programa para kadagiti inna tapno maisuro kadakuada ti usto a pannakataripato ti bagbagida ken saan nga agbalin a narisgo iti panagsikogda.
Kabayatanna, agtultuloy ti panagsursor dagiti City Population Office kadagiti nagduduma a baranggay tapno makita ti situasion dagiti masikog ken maipaayaan isuda iti naan-anay nga adal para iti pagsayaatanda.
