LAOAG CITY – Ad-adda pay a pinaigetan ti Bureau of Fire Protection ti panagmonitor da iti bisperas ti baro a tawen.
Daytoy ti inbatad ni Fire Supt. Roxanne Parado, ti Provincial Firemarshall iti Bureau of Fire Protection ditoy probinsya.
Kuna na nga adda pay dagiti kameng ti Bureau of Fire Protection a tumultulong nga agbantay kadagiti kalsada.
Innayon na nga iti kangitingitan ti panaggatang dagiti umili ti paputok ket balbaliw a nangipatungpal da ti synchronized inspection kadagiti paglakoan ti paputok tapno masigurado nga awan dagiti mailako nga illegal a paputok ditoy probinsya.
Segun ken ni Parado, agpapan maisursurat daytoy a damag ket awan pay dagiti nakumpiskar da nga illegal a paputok ken mangnamnama nga awan ti makumpiskar da agingga a malpas ti baro a tawen.
Mainaig iti daytoy, inbatad ni Parado nga adda ti namonitor da nga aglaklo ti paputok iti online isut gapuna a ti kangrunaan a nagpanawagan na ket ti publiko a saan nga irisgo ti salun-at ken biag babaen ti saan a panaggatang kadagitoy gapu ta saan a nainspeksyon dagitoy.
Kabayatanna, inpakaammo ni Parado nga ita a tawen ket nakairekord da ti 124 fire incidents, nababbaba no ikompara ti 165 a fire incidents idi 2024.
