LAOAG CITY – Inpakaammo ni Senior Fire Officer 2 Augustus Ebina, ti Chief Operation iti Bureau of Fire Protection iti siudad ti Batac nga agtultuloy pay laeng ti naun-uneg nga isaysayangkatda nga imbestigasion iti napasamak nga uram iti Brgy. 1, Ricarte iti nasao a siudad.
Segun kenkuana, manarimaan pay laeng ti pannakisarsaritada iti maseknan a pamilia a nauraman tapno makaalada ti naan-anay pay a detalye iti nasao nga insidente.
Inbatadna a saanda pay a masinunuo ti rason no ania ti namunganayan ti uram pakairamanan ti dagup ti balor dagiti nadadael a kagamitan iti uneg ti pagtaengan dagiti biktima.
Kunana a dua a pamilia ken 15 nga indibidual dagiti agnanaed iti nasao a balay a naaramid laeng iti light materials iti maikadua a kadsaaran daytoy a makaigapu ti alisto a panagramram ti apoy.
Mainaig iti daytoy, segun ken ni Mrs. Carmelita Parbo, maysa kadagiti agnanaed iti nauram a pagtaengan a nakigtotda latta nga adda dagiti residente a kaarubada nga agpukpukkaw nga adda ti maur-uram.
Gapu iti daytoy, kunana a nakarikna ti nerbios kabayatan nga agsangsangit nga agtartaray tapno dumawat ti tulong kadagiti tattao.
Inpalgakna nga idi nakaruar daytoy iti pagtaenganda ket dakkelen ti apoy ken napuskol ti asok iti tangatang.
Inlawlawagna gapu iti alisto a panagramram ti apoy ket natupakan ti maysa a banag iti maysa kadagiti kaduana nga agnanaed iti pagtaengan a nangitunda ti panagsagabana ti sugat iti takyag.
Innayonna a gapu iti insidente ket temporario a nakitarusda pay laeng iti pagtaengan ti kabagianda iti Brgy. Aglipay iti siudad ti Batac.
Kabayatanna, agkidkiddaw ti tulong dagiti maseknan a pamilia iti publiko nangruna ket awan pulos ti naisalbarda gapu iti napasamak nga uram.
Immuna iti daytoy, adda ti innem a firetruck ti nagbibinnulig tapno insigida a masebseban ti dakkel nga apoy no sadino uppat a firetruck ti nausar manipod iti siudad ti Batac, maysa iti ili ti San Nicolas ken maysa iti ili ti Paoay.
