LAOAG CITY – Naragsak ni Barangay Chairman Elviro Agoo iti Barangay Davila iti ili ti Pasuquin iti panaglukat ti Bureau of Fire Protection Sub-Station.
Segun kenni Agoo, adda pay ti maysa a fire truck ken sumarsaruno dagiti ambulansya a nayun iti panagrescue da no adda man ti mapaspasamak a madi.
Inlawlawag na a nabayagen a kiddaw da daytoy nangruna ket adayo ti istasyon ti Bureau of Fire Protection iti Poblacion iti ili da ken iti kabangibang nga ili a Burgos.
Inbatad na a no bilang adda ti mapasamak a desgrasya wenno uram ket saanen nga umabot iti 10 agingga iti 15 a minutos sakbay a makadanon dagiti rescuers isut gapo na a napintas ti panaglukaten ti sub-station ti Bureau of Fire Protection.
Mainaig iti daytoy, kunana nga adda met ti panagsanay dagiti barangay tanod para iti panagresponde ken manamnama manen a maiyuswat daytoy tapno maipalagip kadakuada ti kasapulan a maaramid no adda ti marescue.
Nagyaman met daytoy kadagiti amin nga adda iti likudan ti pannakaipatakder daytoy.
