LAOAG CITY – Binilin ni Department of Health Secretary Ted Herbosa ti Bureau of Quarantine nga mangisayangkat ti intensive screening kadagiti points of entry para kadagiti pasahero nga aggapu iti sabali a pagilian a nakaduktalan dagiti baro a COVID-19 “FLiRT” variants.
Mainaig iti daytoy, kinumpirmaran ni Department of Health (DOH) spokesperson Assistant Secretary Albert Domingo nga amin a Bureau of Quarantine stations ken dadduma pay nga ahensia ket naikabil iti heightened alert segun iti Bureau of Quarantine Memorandum No. 2024-48.
Nakailanad iti memorandum a rumbeng a tungpalen ti publiko dagiti kangrunaan a wagas ti salun-at kas iti regular a panagbuggo iti ima, liklikan dagiti napusek a lugar ken saan a makilangen kadagiti tattao nga addaan iti gurigor wenno trangkaso.
Segun iti DOH, agtalinaed a nababa ti risgo ti amin a rehion iti pagilian iti COVID-19 iti laksid ti napaliiw a bassit a panagngato ti kaso itay nabiit ken namonitor dagiti baro a variant iti sabali a pagilian.
Ti KP.2 ken KP.3 wenno ad-adda a pagaammo kas “FLiRT” covid-19 variants ket imonmonitor ita ti World Health Organization.
