LAOAG CITY – Napagnunumoan ti bus company da Vice Mayor Rey Carlos Fariñas a saan nga agbiahe dagiti bus-da iti aniaman a ruta no awan ti kagudua a pasahero nga aglugan kadagitoy.
Daytoy ket kalpasan ti agtultuloy a panagngato ti presio dagiti produkto a petrolyo gubuay iti mapaspasamak a gubat idiay Middle East.
Segun ken ni Vice Mayor Fariñas, no nababbaba ngem 50% ti nakalugan a pasahero iti maysa a bus ket saanen a matuloy pay nga agbiahe gapu ta malugi met dagitoy.
Inbatadna a no saanda nga aramiden daytoy a wagas ket isuda met ti maapektaran ken kitkitaenda laeng ti pagsayaatan iti panagpataray ti bus company-da.
Inlawlawagna a daytoy nga addangda ket tapno adda ti pagpasueldoda kadagiti driver ken konduktor pakairamanan ti pang-maintenance kadagiti luganda.
Idawdawat ti Bise Mayor kadagiti loyal customers-da a maawatanda koma daytoy a pagalagadan iti bus company-da ken inpasiguradona nga apaman a bumaba ti presio ti gasolina wenno adda ti pagngatoan iti plete ket insigidanto met laeng nga agsubli ti amin.
