LAOAG CITY – Awan dagiti nadangran iti napasamak a desgrasya kalpasan a nadungpar ti maysa a pampasahero a bus ti maysa a dumptruck iti Brgy. 22 Catuguing iti ili ti San Nicolas.
Iti nakalap nga impormasyon ti Bombo Radyo manipud iti saan a nagpainagan a driver ti pampasahero a bus ket inadmitir na a nadungpar na ti dumptruck bayat nga agpapaabagatan da.
Ti palawag ti driver ti Florida bus ket ginandat na ti agovertake iti sarsarunuen na a dumtruck nga addaan ti marka nga Ulep Trucking ngem nagovertake met ti nasao a dumptruck.
Iti mainaig a damag, kinumpirmaran ni Police Major Paul Benedict Parado, hepe ti PNP San Nicolas a nagkapya dagiti dua a driver kalpasan ti aksidente iti Brgy. 22 Catuguing iti nasao nga ili.
Daytoy ket kalpasan a nakapagsarita dagiti dua a maseknan iti kuerpo ti pulisya iti nasao nga ili.
Segun kenni Parado, awan ti bayadan ti driver ti bus iti nadungpar na a dumptruck gapu ta awan ti nadadael idinto a mausar ti insurance ti companya iti pannakatarimaan ti nadadael a paset ti bus.
Iti pakpakauna nga imbestogasyon, inlawlawag ni Parado a napasamak ti aksidente bayat ti panagbiyahe dagiti dua a dadakkel a lugan iti national highway idi ta kelaat a nagsardeng ti dumptruck idinto a saan nga insegida kimmapet ti preno ti bus rason a naidungpar.
Inbatad na nga inkarigatan ti driver ti bus a lisyan ti dumptruck ngem napaay rason a nadadael ti kannawan a sango a parte ti bus.
