LAOAG CITY – Kinumpirmaran ti National Food Authority nga inpangatoda ti buying price ti wet palay kadagiti sumagmamano a rehion ditoy pagilian.
Gapu iti daytoy, ginutigot ti ahensia dagiti mannalon kangrunaanna iti Ilocos, Cagayan Valley ken Central Luzon nga ilakoda ti inapitda nga irik a direkta iti ahensiada.
Basar iti National Food Authority, dumanon iti P19 iti kada kilo dagiti baro nga apit kadagiti nadakamat a rehion iti Pilipinas.
Daytoy ket manipud iti P18 iti kada kilo a maibilang a kababaan a panaglako iti baro nga apit ken wet palay.
Target ti National Food Authority a makagatang ita a tawen ti 545,000 a metriko tonelada ti irik tapno mapagtalinaed ti 9-day supply.
Dumanon met iti 880,000 a metriko tonelada ti target a magatang tapno madanon ti 15 nga aldaw a kasapulan a konsumo iti intero a pagilian.
Maiyataday daytoy iti naamendaran a Rice Tariffication Law.
