LAOAG CITY – Natakawan ti Buyon Elementary School iti Brgy. Buyon iti ili ti Bacarra.
Segun ken ni P/Maj. Antonio Marzan, Hepe ti Bacarra Municipal Police Station, basar iti inwayatda nga imbestigasion, natakawan ti Principal’s Office iti nasao a pagadalan ti printer, laptop ken sumurok-kumurang lima a ribu a pisos.
Inbatadna a naduktalan dagiti maseknan a mangisursuro a natakawan ti pagadalanda kalpasan a nariparda a mapukpukaw dagiti nadakamat a kagamitan.
Inlawlawagna nga awan met ti nakaimuntar a Close Circuit Television iti Buyon Elementary School isu nga agisaysayangkatda pay laeng ti naun-uneg nga imbestigasion tapno maammoan ti pakabigbigan dagiti adda iti likudan ti insidente.
Innayonna a daytoy ti umuna a gundaway a natakawan ti nasao a pagadalan.
