LAOAG CITY – Nairekord ti Canada ti kaunaan a kaso ti human H5 bird flu iti probinsya ti British Columbia no sadinno a 22 a poultry farms ti naestablisar nga infected iti virus.
Basar iti health official, ti tinamaan ti nasao a sakit ket maysa a menor de edad a mapagatapan a nakaptan ti virus iti maysa a tumatayab wenno dadduma pay nga ayop.
Ti H5 bird flu wenno avian influenza ket maysa klase ti virus a naipagagangay a kumapkapet kadagiti ayop kangrunaan na dagiti tumatayab a mabalin a maiwaras kadagiti tattao no dagiti ayop nga addaan ti virus ket direkta a naiggaman, naipauneg wenno nalang-ab.
Iti agdama ket agpapaimbag ti biktima iti children’s hospital.
Segun ken ni Canada health minister Mark Holland, agtultuloy ti panangam-ammo da ti naggapwan ti virus ken no kasanu a naipasa iti biktima.
Sumagmamano kadagiti eksperto ti maalarm gapu ta adda dagiti ebidensya a mangipaneknek a possible nga agtungpal iti pandemya ti nasao a virus gapu iti mabalin nga alisto a maiyakar iti sabali a tao.
Kabayatanna, sumagmamano kadagiti sintomas ti nasao a virus ket panaggurigor, panateng, marigatan nga umanges, panagulaw ken panagsaksakit ti bagi.
