LAOAG CITY – Nagatendar ni Canadian Prime Minister Mark Carney iti naisayangkat a vigil iti Tumbler Ridge, British Columbia, a nakipasetan ti ginasut a tattao tapno ipakita ti napalalo a ladingit da iti pannakatay ti walo nga indibidual iti mass shooting a napasamak iti Tumbler Ridge school iti napalabas a lawas.
Kadwa ni Carney a napan bimmisita iti lugar ti dadduma pay a federal leaders iti political aisle, karaman ditoy ni Canadian Governor-General Mary Simon, kas panangipakita da ti national unity.
Iti panagsarita ni Carney, inbatad na nga agtalinaed iti lagip dagiti Canadians dagiti biktima a pakairamanan ti innem nga ubbing.
Immuna iti daytoy, sakbay ti vigil ket nakipagkita ni Carney kadwa na dagiti dadduma pay a lider iti pamilya dagiti biktima ken dagiti first responders.
Maipalagip a kinanselar ni Carney ti panagbiyahe na idiay Germany tapno agatendar koma ti Munich Security Conference kalpasan ti napasamak a pammaltog iti British Columbia.
