LAOAG CITY – Naiget a naglikudan ni Beth Antonio, caretaker iti videoke bar
iti Barangay 9 iti ili ti Paoay ti reklamo a naidanun ditoy Bombo Radyo Laoag.
Daytoy ket mainaig iti maipagarop a panagop-operaren ti nasao a pasdek iti baet a nagtalinaed ti probinsya iti babaen ti Modifief General Community Quarantine (MGCQ) gapu iti covid-19 pandemic.
Iti reklamo a naidanun iti Bombo Radyo, tunggal madanunen iti oras ti alas-nuebe ti rabii ket maipagarop nga adda dagiti tricycle ken motorsiklo a mapmapan iti lugar.
Rumrumuar a no pumanawen dagiti nakatricycle ken nakamotorsiklo ket madlaw a nakainom da ti arak.
Malaksid iti daytoy, maipagarop nga adda pay dagiti babbai a mapan da laeng iti nasao a lugar no iti rabii.
Nupay kasta, inpasingked ni Antonio nga awan dagiti babbai nga agtrabtrabaho iti nasao a pasdek gapu ta ti laeng kadwa da ket ti dua nga ubbing a babai a kaanakan na ken ti maysa a babai a taga Manila a nalockdown ditoy probinsya.
Inadmitir ni Antonio a dagiti maibagbaga a mapmapan iti videoke bar ket pagayam ti kadwa da a lalaki ken mabain da a saan a manglukat ti videoke.
Inpasingked ni Antonio a saan nga agin-inom ti arak dagiti mapmapan iti lugar.
