LAOAG CITY – Mannarimaan ti Cash for Work dagiti 16 a barangay ditoy siudad ti Laoag partikular iti panagdalus iti sakupen ti Bengngang creek.
Daytoy ti inpakaammo ni Ms. Vilma Ranchez, mangidadaulo ti Community Affairs Office ditoy siudad.
Segun kenkuana, napanunutan ti biang ti lokal a gobierno a madalosan ti nadakamat a lugar gapu ta daytoy ti kangrunaan a pagdalan ti danom no panawen ti panagtutudo.
Kinunana nga adda ti 30 nga indibidual manipud iti tunggal barangay ti napili a makipaset iti nadakamat a programa.
Mainiag iti daytoy, naikkan dagitoy ti Personal Protective Equipment tapno masigurado a natalged dagitoy bayat nga agdaldalosda iti laksid ti kinarigat ti trabho.
Makaawaat ti dagiti makipaset ti P700 iti kada aldaw kas sueldo iti uneg ti lima nga aldaw.
Kabaytanna, nangrugi ti programa idi Nobiembre 18 ken agpatingga inton Nobiembre 22.
