LAOAG CITY – Kinumpirmaran ni Mrs. Geraldine Lucero, Labor Communication Officer 1 iti OWWA Region 1 nga adda ti cash relief a maited kadagiti overseas Filipino worker nga adda ditoy Pilipinas.
Daytoy ket gapu ta saan da pay laeng a makasubli iti pagilian a China, Hongkong ken Macau gapu ti corona virus disease wenno “Covid-19” a baro a nagan ti novel corona virus.
Inlawlawag na a dagiti makagundaway nga OFWs ket dagiti agpapaay kadagiti nasao a pagilian ken agbiyahe kuma idi Pebrero 2 agingga iti Pebrero 16, 2020.
Segun kenni Lucero, 10,000 a pisos ti awaten dagiti maseknan.
Ginutigot na a rugianen dagiti apektado nga OFWs ti agiprosesso kadagiti masapul kas iti photocopy iti passport, identification page, visa, ticket wenno confirmed booking, OEC,Macau wenno Hongkong ID ken valid contract.
Kabayatanna, dagiti agflight iti Pebrero 17 ken dagiti sumarsaruno nga aldaw ket mabalin da nga agturong iti kapitolyo probinsya para iti profiling ken adda ti pakaammo a maawat da manipud iti OWWA.
