LAOAG CITY – Umad-adun ti bilang ti gumatgatang ti school supplies iti dakkel a mall ditoy siudad ti Laoag kagiddan ti umas-asideg a panagsubli ti klase dagiti estudiante.
Segun ken ni Mr. Gian Carlo Quiaoit, Assistant Mall Manager ti SM Laoag, daytoy ket gagangay a mapaspasamak aglalo no dandanin ti bulan ti Hunio a naikeddeng a panangrugi ti klase.
Inlawlawagna nga adda ti ipaay ti dakkel a mall a diskuento tapno matulongan dagiti gumatang a malag-anan ti gastosenda kadagiti kasapulan dagiti annakda iti pagadalan.
Kunana a dakkel a tulong daytoy aglalo iti agdama ket makapaspasar ti pagilian ti krisis.
Mainaig iti daytoy, kabayatan ti panagsursor ti Bombo Radyo Laoag News Team ket naammoan nga iti agdama a presio ti notebook ket manipud 20-31 pesos agingga, papel 18-21 pesos, lapis 10-15 pesos, ballpen 14-62 pesos ken crayons 49-112 pesos.
Innayon ni Quiaoit a kabayatan nga umas-asideg ti panaglukat ti klase ket manamnama a ngumina ti presio dagitoy isu a napintas a gundawayanda ti sale nga ipaay ti mall.
