LAOAG CITY – Ipapaalisto ni Vice Mayor Rey Carlos Fariñas iti panagpirma ni Mayor James Bryan Alcid iti Memorandum of Agreement iti nagbaetan iti Local Government Unit ditoy ciudad ti Laoag ken iti SM Laoag para iti libre a panagbuya iti sine dagiti Senior Citizens ken Persons with Disabilities ditoy ciudad.
Inbatad ti bise mayor nga iti panagturong na iti Federation of Senior Citizens Associations of the Philippines ( FSCAP) building ket naibaga kenkuana a maragsakan dagiti senior citizens iti libre a panagbuyada ti sine iti dakkel a mall ditoy ciudad.
Inlawlawag na nga adda ti pannakaibayag ti nasao nga addang gapu ta naiplastar paylaeng a naimbag, ngem inpanamnama na a paiyalisto na daytoy tapno libre a makabuya ti sine dagiti dagiti senior citizens ken addaan ti rangkap ti bagina ditoy ciudad ti Laoag.
Maipalagip a nangipasa ti konseho iti ordinansa para iti libre a panagbuya ti sine dagiti senior citizens ken addaan ti rangkap ti bagina ditoy ciudad ti Laoag, no sadinno a gagem daytoy nga addang a maikkan ti gundaway dagiti maseknan a mapan mangbuya kadagiti nagduduma a pelikula tapno maalay-ayan wenno maikkat ti marikrikna da nga stress.
