LAOAG CITY – Nagtultuloy ti panagngato ti cash remittances manipod kadagiti Pilipino nga agtrabtrabaho iti nagduduma a pagilian idi 2025.
Basar iti preliminary data manipod iti Bangko Sentral ng Pilipinas (BSP), ngimmato ti cash remittances iti $2.91 billion idi Nobyembre 2025, a nakairekord ti 3.6-percent a panagngato manipod iti $2.81 billion iti isu metlaeng a bolan idi 2024.
Iti baet ti panagngato, ti $2.91 billion a nairekord idi Nobyembre ket isu ti maibilang a kababaan iti monthly level iti uneg ti innem a bolan sipud nairekord ti $2.66 billion idi Mayo 2025.
Daytoy ti nangitunda a ti cash remittances manipod enero agingga iti nobyembre ket immabot iti $32.11 billion, ngimmato iti 3.2 percent manipod iti $31.11 billion iti napalabas a tawen.
